មនុស្សមួយក្រុមដុតលំនៅពលរដ្ឋនិងទីស្នាក់ការសហគមន៍នៅបន្ទាយមានជ័យ
ប្រជាពលរដ្ឋមួយក្រុមមានគ្នាជិត ២០០នាក់ បានដុតលំនៅឋានរបស់អ្នកភូមិពីរខ្នង និងទីស្នាក់ការសហគមន៍មួយខ្នងកាលពីរសៀលថ្ងៃ២៨ ឧសភា នៅភូមិថ្នល់បទ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។
ដោយ សួន សុផលមុន្នី
2013-05-28
លោកស្រី ញឹក សុធា ជាតំណាងប្រជាពលរដ្ឋជាង ២០០គ្រួសារ ឲ្យដឹងកាលពីរសៀលថ្ងៃទី២៨ ខែឧសភា ថា ក្រុមមនុស្សជិត ២០០នាក់ ត្រូវបានគេជួលមកពីក្រុងប៉ោយប៉ែត ដើម្បីដុតបំផ្លាញលំនៅឋានរបស់ប្រជាពលរដ្ឋនៅលើដីដែលធ្លាប់មាន ទំនាស់ទំហំជាង ១ពាន់ហិកតារ។
លោកស្រី ញឹក សុធា៖ «ម៉ោងបីហ្នឹង កូនចៅ យី ភិរម្យ និង សំ ផាន់ណារិទ្ធ គេមករើផ្ទះប្រជាពលរដ្ឋ ប្រហែល ២០០នាក់ គេយកអ្នកប៉ោយប៉ែត មកដុតផ្ទះប្រជាពលរដ្ឋ ហើយគំរាមសម្លាប់ប្រជាពលរដ្ឋផ្ទះឈើប្រក់ស័ង្កសី ដុតទីស្នាក់ការសហគមន៍អស់មួយខ្នង។ ខាង យី ភារម្យ អ្នកបញ្ជាឲ្យកូនចៅមកដុត ហើយគំរាមសម្លាប់ប្រជាពលរដ្ឋខ្ញុំទៀត»។
មិនមានប្រជាពលរដ្ឋណារងរបួសនៅក្នុងអំពើហិង្សានេះទេ។ លោកស្រី ញឹក សុធា ឲ្យដឹងថា ការប្រើអំពើហិង្សាដុតបំផ្លាញលំនៅឋានរបស់អ្នកភូមិនេះ កើតមានឡើងបន្ទាប់ពីអាជ្ញាធរខេត្តបន្ទាយមានជ័យ បានចុះទៅដោះស្រាយទំនាស់នោះ កាលពីថ្ងៃទី២៧ ខែឧសភា ដោយបានសម្រេចឲ្យប្រជាពលរដ្ឋ ២៤៦គ្រួសារ នៅភូមិថ្នល់បទ ឈ្នះកាន់កាប់ដីទំហំជាង ១ពាន់ហិកតារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។ source http://www.rfa.org/khmer/news/social-economy/violation-between-2groups-in-bmc-05282013062832.html